ليه الدفع عند الاستلام هو الأساس في مصر
ناس كتير في مصر مش بتحب تدفع أونلاين لمتجر متعرفهوش. خايفة تدفع ومحدش يبعت. الدفع عند الاستلام بيشيل الخوف ده: "مش هتدفع غير لما تستلم." عشان كده لو بتبيع في مصر، لازم يكون عندك الاختيار ده.
الرحلة كلها خطوة بخطوة
- العميل يطلب من متجرك: اسم، رقم، عنوان، المنتج.
- إنت تأكد على واتساب أو بالتليفون: "أهلا، حضرتك طلبت كذا بسعر كذا، والشحن كذا، والتوصيل خلال كذا يوم. نأكد؟"
- تجهز الشحنة وتسلمها لشركة الشحن.
- المندوب يوصل ويحصل الفلوس من العميل.
- شركة الشحن تحولك الفلوس بعد ما تخصم مصاريفها (كل شركة ليها مواعيد).
- لو الأوردر رجع، المنتج بيرجعلك، وغالبا بتدفع مصاريف الشحن.
٧ حاجات بتقلل الأوردرات اللي بترجع
١. أكد كل أوردر قبل الشحن
أهم واحدة. أوردر متأكدش = فلوس شحن ممكن تضيع. ابعت رسالة واتساب واضحة فيها المنتج والسعر والعنوان، واستنى "تمام". اللي ميردش، كلمه. اللي ميأكدش، متشحنش. (إحنا عندنا بوت واتساب بيعمل ده لوحده لكل أوردر، بس تقدر تعمله بإيدك في الأول.)
٢. السعر كامل من الأول
اكتب السعر ومعاه الشحن في صفحة المنتج. العميل اللي يتفاجئ بمبلغ أكبر عند الباب بيرفض.
٣. مدة توصيل حقيقية
متقولش "يوصل بكرة" وهو هياخد ٤ أيام. العميل بينسى أو بيشتري من حتة تانية.
٤. المنتج زي الصورة
لو الصورة أحلى من الحقيقة، العميل هيرفض لما يشوفه. صور المنتج الحقيقي.
٥. شحن سريع بعد التأكيد
كل يوم بتأخره، احتمال الرفض بيزيد. أكد واشحن في نفس اليوم أو اللي بعده.
٦. عنوان كامل ورقم صح
اطلب في الفورم: المحافظة، المنطقة، علامة مميزة. ورقم بيرد. أوردر بعنوان ناقص غالبا راجع.
٧. شوف مين بيرجع كتير
لو في منطقة أو نوع إعلان بيجيب أوردرات بترجع كتير، غير الاستهداف أو الإعلان.
رسالة تأكيد تقدر تستخدمها
أهلا يا [الاسم] 👋
معاك [اسم المتجر]. حضرتك طلبت [المنتج] بسعر [السعر] جنيه + شحن [الشحن] جنيه.
العنوان: [العنوان].
التوصيل خلال [عدد] أيام والدفع عند الاستلام.
نأكد الأوردر؟ رد بـ "تمام" 🙏
ازاي تختار شركة شحن للدفع عند الاستلام
قبل ما تتفق مع أي شركة، اسأل الأسئلة دي واكتب الإجابات:
- بتحولوا الفلوس اللي حصلتوها كل قد إيه؟ ده بيحدد الفلوس هتلف معاك بسرعة ولا لأ.
- سعر الشحن لكل محافظة؟ وهل في فرق للقاهرة والجيزة عن باقي المحافظات؟
- لو الشحنة رجعت، بتاخدوا كام؟
- المندوب بيسيب العميل يفتح الشحنة؟
- في تتبع للشحنة تقدر تبعته للعميل؟
- بتستلموا من عندي ولا أوصل أنا؟
جرب شركة بعدد أوردرات صغير الأول، وشوف التحويل والمرتجع بنفسك قبل ما تحط كل أوردراتك معاها. القايمة كاملة
اقرا كمان: ازاي تأكد الأوردرات على واتساب · ازاي تختار شركة شحن · ازاي العميل يدفع أونلاين بدل الاستلام
أسئلة بتتسأل كتير
إيه هو الدفع عند الاستلام (COD)؟
العميل بيدفع للمندوب لما يستلم الشحنة، مش وقت الطلب.
البايع بياخد فلوسه امتى؟
شركة الشحن بتحولك الفلوس اللي حصلتها بعد ما تخصم مصاريفها، على حسب مواعيد كل شركة. اسأل قبل ما تتفق.
لو العميل رفض الشحنة؟
المنتج بيرجعلك، وغالبا بتدفع مصاريف الشحن. عشان كده التأكيد مهم.
أقدر أطلب جزء من الفلوس مقدم؟
ممكن مع منتجات غالية، بس ده بيقلل عدد الطلبات. جرب واحسب.
ازاي أقلل الأوردرات اللي بترجع (المرتجع)؟
أكد كل أوردر على واتساب أو بالتليفون قبل الشحن، اكتب السعر والشحن ومدة التوصيل بوضوح، صور المنتج الحقيقي، واشحن بسرعة بعد التأكيد. رسايل التأكيد
عن الكاتب: عبدالرحمن الغنام، ٢١ سنة من القاهرة. بيشغل متاجر بالدفع عند الاستلام في مصر، وشركته INTENTIONS بتبني بوتات واتساب بتأكد الأوردرات. اعرف أكتر · الكورس · يوتيوب · تيك توك · انستجرام