أبسط صورة ليها
- تجيب منتج الناس بتدور عليه. ومش شرط تشتري مخزون كبير.
- تفتح متجرك أونلاين. صفحة فيها المنتج، الصور، السعر، وزرار "اطلب".
- تسوق وتبيع. إعلان بيوصل المنتج لناس محتاجاه.
- الشحن يوصل، والفلوس توصلك. شركة الشحن بتحصل من العميل وترجعلك الفلوس.
ده كل حاجة. كل الباقي تفاصيل بتتعلمها وإنت ماشي.
الخطوات الخمسة من الصفر لأول أوردر
الخطوة ١: اختار المنتج
أهم قرار. منتج غلط = إعلانات بتتصرف من غير بيع. المنتج الكويس:
- بيحل مشكلة واضحة أو بيفرح حد.
- سهل يتفهم في فيديو ١٥ ثانية.
- سعره يسمح بمكسب بعد المنتج والشحن والإعلان.
- مش متاح في كل محل جنبك بنفس السعر.
الخطوة ٢: ابني المتجر
متجر بسيط يطمن اللي بيشتري: اسم واضح، صور كويسة، وصف بالمصري، سعر واضح، فورم طلب سهل، وسياسة استرجاع مكتوبة. Shopify أشهر منصة لكده، وفي منصات تانية. ازاي تعمل متجر Shopify
الخطوة ٣: أول ترافيك
أسرع طريق في مصر هو إعلانات ميتا (فيسبوك وانستجرام). ابدأ بميزانية صغيرة، فيديو بسيط للمنتج، واستهداف واسع. ونزل محتوى مجاني على تيك توك وريلز بالمنتج نفسه. أول إعلان
الخطوة ٤: أول بيعة
الأوردر يوصل. متشحنش على طول. كلم العميل أو ابعتله على واتساب وأكد: الاسم، العنوان، المنتج، السعر. ده بيقلل الأوردرات اللي بترجع. بعدها تسلم الشحنة لشركة الشحن. الدفع عند الاستلام
الخطوة ٥: كبر
لما منتج يجيب أوردرات بمكسب، زود ميزانية الإعلان بالراحة، جرب فيديوهات جديدة، وحسن التأكيد والشحن. ولو المنتج مش شغال، اقفله بسرعة وجرب غيره. ده جزء عادي من الشغل.
إيه اللي بيوقع المبتدئين
- يصرفوا على الإعلان قبل ما يحسبوا. لازم تعرف أقصى مبلغ تدفعه للأوردر. الحسبة
- يحبوا المنتج بدل ما يختبروه. الأرقام هي اللي تقول، مش رأيك.
- ميأكدوش الأوردرات. فالمرتجع ياكل المكسب.
- يقفوا بعد أول إعلان مجابش. أول منتج ممكن ميشتغلش، وده طبيعي.
- يدوروا على خطة سحرية. مفيش. في شغل بيتكرر كل يوم.
محتاج إيه عشان تبدأ
- موبايل أو لابتوب.
- ساعة لساعتين في اليوم.
- فلوس بسيطة للإعلان واشتراك المتجر (بتفرق حسب المنتج). التفاصيل
- صبر على أول شهر.
أول أسبوع ليك، يوم بيوم
- اليوم ١: اتفرج على إعلانات شغالة في مكتبة إعلانات ميتا واكتب ١٠ منتجات.
- اليوم ٢: طبق على كل منتج الـ ٨ أسئلة، وسيب أحسن ٢.
- اليوم ٣: احسب لكل منتج سعر البيع والمكسب وأقصى تكلفة إعلان. سيب واحد.
- اليوم ٤: جيب عينة وصور ٢-٣ فيديوهات قصيرة بموبايلك.
- اليوم ٥: ابني صفحة المنتج على المتجر وراجعها من الموبايل.
- اليوم ٦: اعمل أوردر تجريبي واكتب رسالة تأكيد الواتساب.
- اليوم ٧: شغل أول إعلان بميزانية صغيرة، ومتلمسوش كام يوم.
الأسبوع ده مش هيخليك تكسب، هيخليك تبدأ صح. وده اللي ناقص أغلب الناس.
اقرا كمان: ينفع أبدأ من غير رأس مال؟ · هل التجارة الإلكترونية مربحة في مصر؟ · دروب شيبنج في مصر · السجل التجاري للبيع أونلاين
أسئلة بتتسأل كتير
يعني إيه تجارة إلكترونية بالمصري؟
إنك تبيع منتج أونلاين من متجرك، والعميل يطلب من الموبايل ويستلم على باب بيته.
ينفع أبدأ تجارة إلكترونية من غير خبرة؟
أيوه. أغلب اللي بدأوا كانوا من الصفر. المهم تتعلم بالترتيب: المنتج، المتجر، البيع.
لازم يكون عندي سجل تجاري؟
ناس كتير بتجرب الأول بحجم صغير. لما الشغل يبقى مشروع حقيقي، رتب السجل التجاري والبطاقة الضريبية مع محاسب، والقواعد بتتغير فاتأكد من الجهة الرسمية. التفاصيل
أبدأ بالتجارة الإلكترونية ولا الدروب شيبنج؟
الدروب شيبنج نوع من التجارة الإلكترونية: بتبيع من غير ما تخزن، والمورد بيشحن. في مصر في طرق قريبة من كده، وكل واحدة ليها مميزات وعيوب. دروب شيبنج في مصر
الأوردر الأول بياخد قد إيه؟
بيفرق جدا حسب المنتج والإعلان والمجهود. محدش يقدر يوعدك بمدة، واللي يوعدك متصدقوش.
هل التجارة الإلكترونية مناسبة للمبتدئين؟
أيوه، لو هتمشي بالترتيب: منتج واحد، متجر بسيط، إعلان بميزانية صغيرة مستعد تخسرها، وتأكيد كل أوردر قبل الشحن. اللي بيوقع المبتدئ مش قلة الخبرة، ده إنه يصرف قبل ما يحسب.
عن الكاتب: عبدالرحمن الغنام، ٢١ سنة من القاهرة، بيبيع أونلاين من وهو ١٦ سنة وبيعلم الشباب في مصر التجارة الإلكترونية من الصفر لأول أوردر. اعرف أكتر · الكورس · انستجرام · تيك توك · يوتيوب