قبل الإعلان
- متجر جاهز ومتراجع من الموبايل. المتجر
- رقم الأمان: أقصى مبلغ تدفعه في الإعلان للأوردر الواحد. الحسبة
- حساب إعلانات على Meta Business وطريقة دفع شغالة.
- Pixel (أو الربط بتاع Shopify مع ميتا) عشان الإعلان يعرف مين اشترى.
الخطوات
١. الهدف
اختار هدف المبيعات لو العميل بيطلب من المتجر. لو بتقفل البيعة على واتساب، اختار هدف الرسائل. الهدف بيقول لميتا تدورلك على مين.
٢. الجمهور
- المكان: مصر (أو المحافظات اللي بتشحن ليها).
- السن والنوع: حسب المنتج.
- الاهتمامات: في الأول سيبه واسع. ميتا بقت بتلاقي المشتري لوحدها أحسن من الاستهداف الضيق، خصوصا مع ميزانية صغيرة.
٣. الميزانية
ميزانية يومية صغيرة على كام يوم. الهدف في الأول إنك تتعلم المنتج شغال ولا لأ، مش إنك تكسب من أول يوم.
٤. الإعلان نفسه (أهم حاجة)
- فيديو عمودي قصير (١٥-٣٠ ثانية) للمنتج الحقيقي.
- أول ٣ ثواني: المشكلة أو "الواو". لو مفيش حاجة تشد، الناس هتعدي.
- مكتوب على الفيديو الفايدة بالمصري.
- النص: سطرين: بيعمل إيه + "الدفع عند الاستلام" + السعر لو حابب.
- اعمل ٢-٣ فيديوهات مختلفة عشان تعرف أنهي اللي شغال.
٥. سيبه يشتغل
متغيرش كل ساعة. سيبه كام يوم. كل تعديل كبير بيرجعه يتعلم من الأول.
الأرقام اللي تبص عليها
| الرقم | يعني إيه | لو وحش |
|---|---|---|
| تكلفة الأوردر (Cost per purchase) | بتدفع كام في الإعلان عشان أوردر واحد | أهم رقم. لو أعلى من رقم الأمان، غير حاجة |
| CTR | كام واحد من اللي شافوا الإعلان داسوا | لو قليل، الفيديو أو أول ٣ ثواني ضعاف |
| CPM | بتدفع كام عشان ١٠٠٠ واحد يشوفوا الإعلان | لو عالي جدا، الجمهور ضيق أو الإعلان مش عاجب |
| نسبة التأكيد | كام أوردر اتأكد من اللي جه | لو قليلة، الإعلان بيجيب ناس مش جادة |
امتى تكمل وامتى تقفل
- تكلفة الأوردر أقل من رقم الأمان: كمل، وزود الميزانية بالراحة.
- قريبة منه: جرب فيديو جديد أو عرض أوضح.
- أعلى منه كتير بعد كام يوم: اقفل. المنتج أو الفيديو مش شغالين. جرب غيره.
ازاي تصور فيديو الإعلان بموبايلك
مش محتاج كاميرا ولا مصور:
- نور شباك قدام المنتج، مش وراه.
- إيدك والمنتج في أول ثانية: بيتفتح، بيتلبس، بيشتغل.
- المشكلة قبل الحل: "زهقت من كذا؟" وبعدين المنتج وهو بيحلها.
- لقطات قصيرة ٢-٣ ثواني ورا بعض، مش لقطة واحدة طويلة.
- كلام مكتوب كبير على الشاشة بالمصري، لأن ناس كتير بتتفرج من غير صوت.
- آخر لقطة: المنتج + "الدفع عند الاستلام".
صور ٥ نسخ في نفس القعدة بأول ٣ ثواني مختلفين، وشغل أحسن ٢-٣.
غلطات أول إعلان
- "Boost" البوست من الصفحة بدل Ads Manager.
- استهداف ضيق جدا بميزانية صغيرة.
- صورة واحدة من النت بدل فيديو حقيقي.
- تغيير الإعلان كل ساعتين.
- تحكم من غير ما تحسب رقم الأمان.
- وعود في الإعلان مش حقيقية (ميتا بتقفل الإعلانات دي، والعملاء بيرجعوا).
اقرا كمان: الإعلان الممول على فيسبوك بكام في مصر؟ · إعلاني شغال ومش جايب أوردرات · تبيع على فيسبوك وانستجرام: بموقع ولا من غيره
أسئلة بتتسأل كتير
أقل ميزانية أبدأ بيها إعلان ميتا في مصر؟
ميتا بتسمح بميزانيات يومية صغيرة. الأهم إنك تحط ميزانية تجربة تكفي كام يوم وإنت مستعد تخسرها. التفاصيل
أعمل إعلان رسائل ولا مبيعات؟
لو العميل بيطلب من المتجر: مبيعات. لو بتقفل على واتساب: رسائل.
ليه الإعلان بتاعي اترفض؟
غالبا بسبب وعود مبالغ فيها، صور قبل وبعد، أو كلام عن فلوس وصحة. اقرا سياسات الإعلان بتاعة ميتا.
كيفية عمل إعلان ممول على فيسبوك من الهاتف؟
ينفع من تطبيق Meta Ads Manager على الموبايل، بس أول مرة الأسهل تعملها من الكمبيوتر عشان تشوف كل الإعدادات قدامك. الخطوات نفسها: الهدف، الجمهور، الميزانية، الإعلان.
الإعلان شغال ومش جايب أوردرات، أعمل إيه؟
راجع بالترتيب: الإعلان اتوافق عليه؟ أخد وقت كفاية؟ أول ٣ ثواني بتشد؟ العرض والسعر؟ المتجر بيطمن؟ الخطوات كاملة
عن الكاتب: عبدالرحمن الغنام، ٢١ سنة من القاهرة، بيشغل إعلانات ميتا لمتاجره بنفسه، وشركته INTENTIONS بتبني أدوات AI للإعلانات. اعرف أكتر · الكورس · يوتيوب · تيك توك · انستجرام