قبل ما تفتح الحساب
جهز:
- اسم للمتجر سهل يتقري ويتكتب.
- منتج واحد إنت مختاره ومحسوب. ازاي تختار
- صور وفيديو حقيقي للمنتج (صوره بنفسك لو تقدر).
- رقم واتساب للتواصل وتأكيد الأوردرات.
الخطوات
١. افتح الحساب
ادخل على موقع Shopify واعمل حساب. غالبا في فترة تجربة، وبعدها اشتراك شهري بالدولار (شوف السعر الحالي على الموقع). اختار مصر كبلد المتجر، والجنيه المصري كعملة.
٢. اختار ثيم
اختار ثيم بسيط وسريع. مش محتاج حاجة معقدة. المهم:
- صورة المنتج كبيرة وواضحة.
- زرار الطلب باين من غير ما تنزل كتير.
- الخط بيتقري كويس بالعربي.
(اللي مشتركين في كورسي بياخدوا ثيم جاهز.)
٣. صفحة المنتج
دي أهم صفحة. اكتب:
- عنوان واضح: المنتج بيعمل إيه، مش اسم موديل.
- السعر بالجنيه، واضح.
- ٣-٥ مميزات في نقط قصيرة بالمصري: بيحل إيه في حياة العميل؟
- صور حقيقية + فيديو قصير.
- أسئلة شائعة: الشحن بياخد قد إيه؟ ينفع أفتح الشحنة؟ لو مش عاجبني؟
- الطلب بالدفع عند الاستلام مكتوب بوضوح.
٤. الدفع عند الاستلام
من إعدادات الدفع في Shopify، فعل طريقة الدفع اليدوي "الدفع عند الاستلام" (Cash on Delivery). ده اللي أغلب الناس في مصر هتختاره. لو حابب تضيف كارت أو محافظ، في بوابات دفع مصرية بتشتغل مع Shopify.
٥. الشحن
حدد سعر شحن واضح (سعر واحد أو حسب المحافظة). اتفق مع شركة شحن بتحصل الفلوس عند الاستلام (COD) وبترجعهالك. اسأل قبل ما تتفق: بتحول الفلوس كل قد إيه؟ بتاخد كام لو الشحنة رجعت؟
٦. الصفحات اللي تطمن
- سياسة الاسترجاع والاستبدال.
- تواصل معانا (واتساب + إيميل).
- من إحنا (سطرين حقيقيين).
- سياسة الشحن.
العميل المصري خايف يتنصب عليه. الصفحات دي بتقول له إن في حد حقيقي ورا المتجر.
٧. راجع من الموبايل
افتح المتجر من موبايلك واعمل أوردر تجريبي. اسأل نفسك: لو أنا مش أعرف المتجر ده، هطلب منه؟
قايمة قبل أول إعلان (٢٠ ثانية)
- [ ] الصفحة بتفتح بسرعة على الموبايل.
- [ ] السعر والشحن واضحين.
- [ ] الدفع عند الاستلام شغال.
- [ ] الأوردر التجريبي وصلك.
- [ ] رقم الواتساب صح.
- [ ] صفحة الاسترجاع موجودة.
- [ ] مفيش كلام إنجليزي غريب أو أخطاء.
- [ ] حاسب أقصى تكلفة إعلان للأوردر. الحسبة
غلطات بتخلي المتجر ميبيعش حتى لو الإعلان كويس
- الصفحة تقيلة: صور ضخمة وتطبيقات كتير بتخلي الصفحة تفتح ببطء، والعميل يقفل قبل ما يشوف المنتج.
- وصف منسوخ من موقع أجنبي بإنجليزي أو بعربي مترجم غريب.
- السعر مستخبي أو الشحن بيظهر في الآخر بس.
- مفيش أي رقم أو اسم يقول إن في حد حقيقي ورا المتجر.
- فورم طلب طويل بيسأل عن حاجات ملهاش لازمة.
- ألوان وخطوط كتير تخلي المتجر شكله مش مظبوط.
ابدأ بسيط: صفحة منتج واحدة نظيفة أحسن من متجر فيه ٥٠ منتج مش مترتبين.
اقرا كمان: Shopify ولا EasyOrders؟ · ازاي تختار اسم لمتجرك · ازاي العميل يدفع أونلاين في متجرك
أسئلة بتتسأل كتير
Shopify بيشتغل في مصر؟
أيوه، تقدر تفتح متجر وتبيع في مصر بالجنيه وبالدفع عند الاستلام.
Shopify ولا منصة تانية؟
Shopify سهل ومشهور وفيه تطبيقات كتير. في منصات تانية مصرية أو عربية أرخص أو معمولة للدفع عند الاستلام. اختار اللي تقدر تشغله وتفهمه. المقارنة
محتاج أعرف برمجة؟
لأ. كله سحب وإفلات وكتابة.
محتاج دومين؟
مش ضروري في الأول، بس دومين باسم المتجر بيطمن العميل أكتر.
هل ينفع أعمل متجر إلكتروني مجاني في مصر؟
Shopify بيدي فترة تجربة، وبعدها اشتراك شهري بالدولار، فاتأكد من السعر الحالي على صفحة الأسعار بتاعتهم. منصات تانية ليها خطط مختلفة. في كل الحالات حط الاشتراك ضمن رأس مالك من الأول.
عن الكاتب: عبدالرحمن الغنام، ٢١ سنة من القاهرة. أول بيعة أونلاين ليه كانت من متجر Shopify عمله بنفسه وهو ١٦ سنة. اعرف أكتر · الكورس · يوتيوب · تيك توك · انستجرام