الدروب شيبنج يعني إيه ببساطة
انت عندك متجر وإعلان. المورد عنده المنتج والمخزن.
- الزبون يطلب من متجرك.
- انت تأكد الأوردر معاه.
- تبعت الأوردر للمورد.
- المورد يجهز ويشحن للزبون.
- الفلوس تتحصل، والمورد ياخد تمن المنتج، وانت تاخد الفرق.
ميزته: مش محتاج تشتري مخزون في الأول، وده بيقلل رأس المال اللي محتاجه. عيبه: انت مش ماسك المنتج في إيدك، ومكسبك بيعتمد على مورد انت مش متحكم فيه.
وعن سؤال الحلال والحرام، دار الإفتاء ليها فتوى في الموضوع ده، ملخصها في التجارة الإلكترونية والدروب شيبنج حلال ولا حرام.
الدروب شيبنج الدولي: من برا لمصر
يعني تبيع منتج من موقع برا مصر، زي AliExpress، والمنتج يتشحن من هناك للزبون في مصر.
مشاكله في السوق المصري:
- الشحن بياخد وقت طويل. الزبون المصري متعود يستلم في أيام، مش أسابيع.
- الجمارك. الشحنة ممكن تقف أو يطلع عليها مصاريف مكانتش في حسابك.
- الدفع عند الاستلام صعب. أغلب الناس في مصر بتشتري بالدفع عند الاستلام، والشحن من برا مش ماشي مع ده بسهولة: انت بتدفع للمورد قبل ما الزبون يدفعلك، ولو رفض الشحنة الخسارة عليك.
- المرتجع صعب ومكلف.
عشان كده ناس كتير بتبعد عنه في مصر، أو بتستخدمه بس عشان تشوف منتجات وأفكار.
الدروب شيبنج المحلي: مورد في مصر
يعني مورد أو مخزن في مصر عنده المنتج، وبيشحن للزبون جوه مصر، وغالبا بالدفع عند الاستلام.
ليه ده الأقرب للسوق:
- توصيل في أيام مش أسابيع.
- ماشي مع الدفع عند الاستلام. المندوب بيحصل الفلوس، وانت بتاخد فرقك بعد كده.
- مفيش جمارك على كل شحنة.
بس برضه في مخاطر، وأهمها إن تجربة الزبون كلها في إيد المورد: التغليف، السرعة، المنتج نفسه.
موردين ومواقع دروب شيبنج في مصر: ازاي تختبر أي مورد
مش هقولك أسماء مواقع أو موردين وأرتبهم. اللي يشتغل مع غيري ممكن ميشتغلش معاك، والأسعار والشروط بتتغير. الأهم إنك تعرف تختبر أي مورد بنفسك:
- اطلب أوردر لنفسك. بعنوانك ورقمك، زي أي زبون. شوف المنتج وصل إمتى، شكله، تغليفه، وهل زي الصورة.
- اسأل: المرتجع مين بيشيله؟ لو الزبون رفض، المنتج بيرجع فين، ومين بيدفع الشحن؟
- اسأل: بتحولولي فلوسي إمتى وازاي؟ كل كام يوم، وبأنهي طريقة، وفي حد أدنى للتحويل؟
- اسأل عن المخزون. المنتج متوفر بكمية تكفي لو الإعلان اشتغل؟ ولو خلص، هتعرف ازاي؟
- اطلب تتبع للشحنات تقدر تبعته للزبون.
- اكتب كل الاتفاق في رسالة واضحة، حتى لو بينكم واتساب بس.
- ابدأ بعدد صغير. شوف التحويل والمرتجع بنفسك قبل ما تحط كل أوردراتك معاه.
المورد اللي يتهرب من سؤال من دول، أو يرد بكلام عام، ده جواب لوحده.
المخاطر اللي محدش بيقولها
- هامشك ضيق. المورد بياخد تمن المنتج وتجهيزه، والإعلان والمرتجع عليك. احسب قبل ما تعلن. الحسبة ورقم الأمان
- المنتج نفسه ممكن يكون عند ناس كتير. لو موردك بيبيع لعشرات المتاجر، هتلاقي نفس المنتج في إعلانات كتير بأسعار مختلفة.
- الزبون مش عارف المورد. لو الشحنة اتأخرت أو المنتج وحش، الزبون بيزعل منك انت.
- تأخير التحويلات ممكن يوقف شغلك لو الإعلانات محتاجة فلوس كل يوم.
- المورد ممكن يغير السعر أو يوقف المنتج في أي وقت.
الدروب شيبنج مش "فلوس من غير مجهود". هو طريقة تبدأ بيها بمخزون أقل، بس الشغل كله لسه عليك: المنتج، الإعلان، التأكيد، وخدمة الزبون. ومحدش يقدر يضمنلك إنه هيكسب.
كورس دروب شيبنج في مصر: محتاجه؟
مش لازم. بس لو هتتعلم من حد، اتأكد إنه بيشرح السوق المصري بالذات: الدفع عند الاستلام، التأكيد، الشحن، والحسبة. وإن مفيش حد بيضمنلك أرباح. في نقط تساعدك تختار في ازاي تختار كورس تجارة إلكترونية.
لو عايز تمشي الخطوات بالترتيب لحد أول أوردر، ده اللي بشرحه في الكورس.
أسئلة بتتسأل كتير
ما هو الدروب شيبنج وهل ينفع في مصر؟
الدروب شيبنج إنك تبيع منتج والمورد هو اللي يشحنه للزبون، من غير ما تشتري مخزون. ينفع في مصر، وغالبا المحلي بالدفع عند الاستلام هو اللي ماشي مع السوق أكتر من الشحن من برا.
إيه الفرق بين الدروب شيبنج المحلي والدولي؟
الدولي المنتج بيتشحن من برا مصر، فالتوصيل بياخد وقت وممكن يعدي على الجمارك، وصعب مع الدفع عند الاستلام. المحلي المورد في مصر وبيشحن في أيام وغالبا بالدفع عند الاستلام.
ألاقي موردين دروب شيبنج في مصر ازاي؟
مش هرتبلك أسماء. أي مورد تلاقيه، اختبره: اطلب أوردر لنفسك، واسأل مين بيشيل المرتجع، وبيحولك فلوسك إمتى، وابدأ بعدد صغير.
هل الدروب شيبنج مربح؟
ممكن، على حسب الحسبة: سعر البيع ناقص تمن المورد والإعلان والمرتجع. الهامش غالبا أضيق من لو انت شاري المخزون. التفاصيل في هل التجارة الإلكترونية مربحة.
محتاج رأس مال للدروب شيبنج؟
محتاج أقل لأنك مش شاري مخزون، بس لسه محتاج فلوس للإعلانات وللمتجر، وممكن تحتاج تستحمل فترة لحد ما فلوس التحصيل توصلك.
عن الكاتب: عبدالرحمن الغنام، ٢١ سنة من القاهرة، شغال في التجارة الإلكترونية من وهو ١٦ سنة، ومؤسس INTENTIONS. بيعلم الشباب في مصر يبنوا متجرهم من الصفر لأول أوردر. اعرف أكتر · الكورس · انستجرام · تيك توك · يوتيوب