ليه الحسبة دي أهم حاجة
أكتر سبب الناس بتخسر في التجارة الإلكترونية: بتبيع وهي مش عارفة بتكسب ولا بتخسر. الأوردرات بتيجي، الإعلانات بتتصرف، وآخر الشهر الفلوس مش موجودة. الحسبة دي بتاخد ٥ دقايق، وبتقولك قبل ما تصرف: المنتج ده ينفع ولا لأ.
الحسبة خطوة بخطوة
١. اكتب أرقامك
- سعر البيع (اللي العميل بيدفعه في المنتج).
- تكلفة المنتج عليك.
- التغليف.
- الشحن اللي بتدفعه لشركة الشحن (لو مش العميل اللي بيدفعه).
- نسبة الأوردرات المتأكدة اللي بتوصل فعلا (من خبرتك، أو قدرها في الأول وعدلها بعدين).
٢. المكسب قبل الإعلان
سعر البيع − (المنتج + التغليف + الشحن) = المكسب قبل الإعلان
٣. حط المرتجع في الحسبة
الأوردرات اللي بترجع بتكلفك شحن من غير بيع. أبسط طريقة: اضرب المكسب قبل الإعلان في نسبة التوصيل، واطرح تكلفة الشحن الضايعة على الأوردرات الراجعة.
٤. نقطة التعادل
الرقم اللي طلع = أقصى مبلغ تدفعه في الإعلان للأوردر من غير مكسب ولا خسارة.
٥. رقم الأمان
اختار رقم أقل من نقطة التعادل، يسيبلك المكسب اللي إنت عايزه. ده الرقم اللي هتقارن بيه تكلفة الأوردر في Ads Manager. أول إعلان
مثال (أرقام توضيحية، مش أرقام حقيقية لمنتج معين)
| البند | جنيه |
|---|---|
| سعر البيع | 450 |
| تكلفة المنتج | 150 |
| تغليف | 10 |
| شحن | 60 |
| المكسب قبل الإعلان | 230 |
لو افترضنا إن ٨ من كل ١٠ أوردرات متأكدة بتوصل، و٢ بيرجعوا وبتدفع شحنهم (60 × 2 = 120):
- مكسب ٨ أوردرات: 230 × 8 = 1840
- ناقص شحن الراجعين: 1840 − 120 = 1720
- على ١٠ أوردرات متأكدة: 1720 ÷ 10 = 172 جنيه نقطة التعادل للأوردر المتأكد
يعني لو بتدفع في الإعلان أكتر من 172 جنيه للأوردر المتأكد، بتخسر. لو عايز تكسب، رقم الأمان يبقى مثلا 110-120 جنيه.
غير الأرقام دي بأرقامك الحقيقية. كل منتج ليه حسبة.
ازاي تحسن الحسبة لو طالعة وحشة
- ارفع السعر لو المنتج قيمته أعلى من سعره (جرب).
- اعمل عرض قطعتين عشان متوسط الأوردر يكبر والشحن يتقسم.
- قلل المرتجع بالتأكيد على واتساب. الدفع عند الاستلام
- فاوض المورد لما الكمية تكبر.
- حسن الفيديو عشان تكلفة الأوردر تقل.
- لو مفيش حل، سيب المنتج. مش كل منتج حلو ينفع يتباع بإعلانات.
راجع الحسبة كل أسبوع
الحسبة مش حاجة بتعملها مرة وخلاص. كل أسبوع افتح الأرقام الحقيقية:
- كام أوردر جه، وكام اتأكد، وكام اتسلم فعلا.
- صرفت كام في الإعلان الأسبوع ده.
- قسم الإعلان على الأوردرات اللي اتسلمت. ده الرقم الحقيقي.
- قارنه برقم الأمان.
لو الرقم الحقيقي أعلى من اللي في Ads Manager بكتير، يبقى المرتجع أو التأكيد هما المشكلة، مش الإعلان. ولو الأسعار عند المورد أو الشحن اتغيرت، عدل الحسبة من الأول.
اقرا كمان: هل التجارة الإلكترونية مربحة في مصر؟ · الإعلان الممول على فيسبوك بكام؟ · ازاي تلاقي منتج رابح
أسئلة بتتسأل كتير
يعني إيه نقطة التعادل في الإعلانات؟
أقصى مبلغ تدفعه في الإعلان للأوردر الواحد من غير ما تكسب ولا تخسر.
المكسب الكويس في المنتج قد إيه؟
مفيش رقم واحد. المهم المكسب قبل الإعلان يكون كبير كفاية يغطي الإعلان والمرتجع ويفضل مكسب. المنتجات الرخيصة جدا غالبا صعبة بالإعلانات.
أحسب على الأوردر اللي جه ولا اللي اتسلم؟
على اللي اتسلم واتحصل فعلا. الأوردر اللي رجع مش فلوس.
كيف أحسب هامش الربح للمنتج؟
هامش الربح = (سعر البيع ناقص كل التكاليف) ÷ سعر البيع، واضرب في ١٠٠ تطلع النسبة. التكاليف هنا: المنتج، التغليف، الشحن، تكلفة الإعلان للأوردر، ونصيب المرتجع.
عن الكاتب: عبدالرحمن الغنام، ٢١ سنة من القاهرة. الحسبة دي جزء من كورسه ("الحسبة ورقم الأمان"). اعرف أكتر · الكورس · يوتيوب · تيك توك · انستجرام