إيه هي مكتبة إعلانات فيسبوك؟
دي قاعدة بيانات عاملاها ميتا عشان أي حد يشوف الإعلانات الشغالة على فيسبوك وانستجرام وباقي تطبيقاتها. مفتوحة للناس كلها ومجانية. (ميتا: مكتبة الإعلانات)
بالنسبة لك كبايع، دي أقرب حاجة لإنك تشوف السوق بيصرف فلوسه على إيه دلوقتي.
خطوة بخطوة: ازاي تدور؟
- افتح facebook.com/ads/library.
- اختار البلد: مصر. النتايج بتتغير حسب البلد اللي تختاره.
- اختار نوع الإعلان: كل الإعلانات.
- اكتب كلمة بحث بالعربي، زي: "الدفع عند الاستلام"، "شحن مجاني"، "اطلب الآن"، أو اسم نوع منتج (مثلا: "ساعة"، "منظم"، "شنطة").
- فلتر على الإعلانات الشغالة (Active) لو الاختيار ظاهرلك.
- افتح كل إعلان واقرا: المنتج إيه، السعر كام، العرض إيه، وبدأ يتعرض امتى.
خطوات الفلاتر ممكن تتغير شكلها من وقت للتاني، بس الفكرة واحدة.
إيه الإشارات اللي تدور عليها؟
إعلان شغال من فترة طويلة
كل إعلان مكتوب عليه بدأ يتعرض امتى. إعلان شغال من أسابيع أو شهور غالبا صاحبه شايف إنه بيستاهل الفلوس، لأن محدش بيفضل يدفع في حاجة بتخسره وهو عارف.
إعلانات كتير لنفس المنتج
لو لقيت نفس الصفحة عاملة كذا إعلان لنفس المنتج بفيديوهات مختلفة، ده معناه إنها بتختبر وبتكمل عليه. ولو لقيت كذا صفحة مختلفة بتبيع نفس المنتج، ده معناه إن في طلب.
تعليقات حقيقية
افتح الإعلان على فيسبوك وشوف التعليقات. "بكام؟" و"بيوصل المنصورة؟" دي ناس عايزة تشتري. التعليقات اللي كلها شكاوي دي إشارة تانية خالص.
إيه اللي متستنتجهوش من المكتبة؟
- إعلان شغال مش معناه إنه بيكسب. ممكن صاحبه لسه بيختبر، أو بيخسر ومش واخد باله.
- المكتبة مش بتقولك المبيعات. انت مش شايف أوردرات ولا أرباح حد.
- منتج عليه إعلانات كتير أوي ممكن يكون السوق اتملى بيه، والسعر نزل.
- مش كل حاجة شغالة برا هتشتغل في مصر. ركز على الإعلانات اللي بتتعرض في مصر.
بعد ما تلاقي منتج: اتأكد منه
المكتبة بتديك فكرة. التأكيد بيبقى بالحسبة والتجربة:
- الهامش: سعر البيع ناقص المنتج والتغليف والشحن، يسيب مساحة للإعلان والمكسب؟ الحسبة
- الشحن: المنتج سهل يتشحن؟ مش بيتكسر؟ مش مقاسات كتير بتعمل مرتجع؟
- تقدر تتميز؟ صور أحسن، فيديو أوضح، عرض أحسن، خدمة أسرع. لو هتبيع نفس الحاجة بنفس الشكل بنفس السعر، مفيش سبب العميل يختارك.
- المورد: تقدر تجيبه بجودة ثابتة؟
لو المنتج عدى من دول، اختبره بإعلان صغير. الأرقام هي اللي بتقول رابح ولا لأ. التفاصيل الكاملة للأسئلة اللي تسألها: ازاي تلاقي منتج رابح في مصر.
متنسخش إعلانات الناس
خد الفكرة، مش الفيديو والكلام زي ما هما. صور المنتج بنفسك، واكتب الكلام بطريقتك. النسخ حرفي بيخليك نسخة أضعف من حد سابقك، وممكن يعرض إعلانك للمشاكل. اتعلم من الإعلان: البداية بتشد ازاي؟ العرض إيه؟ وبعدين اعمل أحسن منه.
لو عايز تمشي الخطوات دي بالترتيب لحد أول أوردر، ده اللي بشرحه في الكورس.
أسئلة بتتسأل كتير
كيف أجد منتج رابح باستخدام مكتبة إعلانات فيسبوك؟
اختار مصر، ابحث بكلمات زي "الدفع عند الاستلام"، ودور على منتجات ليها إعلانات شغالة من فترة طويلة أو إعلانات كتير. بعدها احسب الهامش واختبر بإعلان صغير.
مكتبة الإعلانات مجانية؟
أيوه، مفتوحة لأي حد ومجانية.
إعلان شغال من شهور يبقى منتج رابح أكيد؟
لأ. دي إشارة إن حد بيصرف عليه، مش دليل إنه بيكسب. الدليل الوحيد هو تجربتك انت وأرقامك.
أقدر أشوف مبيعات المنافس من المكتبة؟
لأ. المكتبة بتوريك الإعلان نفسه وبدأ امتى، مش الأوردرات ولا الأرباح.
ينفع آخد نفس الفيديو بتاع المنافس؟
متاخدوش زي ما هو. خد الفكرة وصور بنفسك واكتب بكلامك.
عن الكاتب: عبدالرحمن الغنام، ٢١ سنة من القاهرة، شغال في التجارة الإلكترونية من وهو ١٦ سنة، ومؤسس INTENTIONS. بيعلم الشباب في مصر يبنوا متجرهم من الصفر لأول أوردر. اعرف أكتر · الكورس · انستجرام · تيك توك · يوتيوب