الـ ٨ أسئلة (نعم / لا)
اكتب كل منتج في صف، وجاوب بنعم أو لا:
- بيحل مشكلة أو بيفرح؟ (وجع، وقت، شكل، هدية)
- بيتفهم في فيديو ١٥ ثانية؟ لو محتاج شرح طويل، صعب يتباع بإعلان.
- فيه "واو"؟ حاجة تخلي اللي بيسكرول يقف.
- مش في كل محل بنفس السعر؟ لو موجود جنب البيت أرخص، محدش هيستنى الشحن.
- الحسبة تمشي؟ سعر البيع ناقص المنتج والشحن يسيب مساحة كويسة للإعلان والمكسب. الحسبة
- سهل يتشحن؟ مش تقيل جدا، مش بيتكسر، مش ليه مقاسات كتير بتعمل مرتجع.
- ليه جمهور كبير في مصر؟ مش منتج لعشرة أشخاص بس.
- تقدر تجيبه بسهولة وبجودة ثابتة؟
المنتج اللي ياخد ٦ نعم أو أكتر يستاهل تختبره. أقل من كده، عدي.
فين تدور
مكتبة إعلانات ميتا (Meta Ad Library)
مجانية ومفتوحة لأي حد. اكتب كلمة (زي اسم منتج أو "الدفع عند الاستلام")، اختار مصر، وشوف الإعلانات الشغالة. الإعلان اللي شغال من فترة طويلة غالبا بيكسب، لأن محدش بيفضل يدفع في إعلان خسران.
تيك توك وريلز
ابحث عن فيديوهات منتجات عليها تفاعل كبير وتعليقات زي "بكام؟" و"بيتباع فين؟". التعليقات دي طلب حقيقي.
الأسواق والمواقع الكبيرة
شوف الأكثر مبيعا والتقييمات. التقييمات السلبية بتقولك المشاكل اللي تقدر تحلها إنت.
حياتك
حاجة إنت أو حد في بيتك اشتراها وفرقت معاه. ابدأ منها واختبرها بالـ ٨ أسئلة.
ازاي تختبر المنتج
- جيب عينة وصور فيديو حقيقي قصير.
- اعمل صفحة منتج بسيطة على متجرك.
- إعلان صغير على فيسبوك وانستجرام لأيام قليلة.
- بص على الأرقام: بتدفع كام في الأوردر؟ أقل من رقم الأمان بتاعك؟
- القرار: شغال؟ كمل وزود بالراحة. مش شغال؟ اقفل وجرب التاني. متتعلقش بمنتج.
اعمل شيت منتجات
متدورش في دماغك. افتح شيت (Google Sheets أو Excel) واعمل أعمدة:
| المنتج | لقيته فين | سعر البيع | التكلفة | المكسب قبل الإعلان | الـ ٨ أسئلة (كام نعم) | قرار |
|---|
حط فيه ٢٠-٤٠ منتج على أسبوع. هتلاقي إن أغلبهم بيقع من غير ما تصرف جنيه، وده الهدف: إن المنتجات الضعيفة تقع على الورق مش في الإعلانات. المنتجين أو التلاتة اللي فاضلين هم اللي تختبرهم.
(طلاب كورسي بياخدوا شيت جاهز بـ ٤٠ منتج و٨ أسئلة، والنقط بتتحسب لوحدها.)
غلطات شائعة
- تختار منتج عشان إنت بتحبه.
- تنسخ منتج بنفس الفيديو ونفس السعر بتاع غيرك، من غير أي فرق.
- تختار منتج رخيص جدا مفيهوش مساحة لإعلان.
- تشتري مخزون قبل ما تختبر.
- تحكم على المنتج من أول يوم إعلان.
اقرا كمان: مكتبة إعلانات فيسبوك خطوة بخطوة · ChatGPT والذكاء الاصطناعي في متجرك · ازاي تحسب سعر المنتج
أسئلة بتتسأل كتير
في منتجات رابحة مضمونة؟
لأ. أي حد يبيعلك "قايمة منتجات رابحة مضمونة" بيبيعلك كلام. المنتج اللي كسب مع حد ممكن يخسر معاك لو الفيديو أو السعر أو التوقيت مختلف.
أبيع منتج واحد ولا متجر فيه كل حاجة؟
في الأول منتج واحد أو قليل، عشان تركز الإعلان وتفهم الأرقام.
أعرف منين إن المنتج عليه طلب في مصر؟
إعلانات شغالة من فترة في مكتبة إعلانات ميتا، تعليقات "بكام" على تيك توك، والأكثر مبيعا في الأسواق.
أختبر كام منتج قبل ما ألاقي واحد شغال؟
مفيش رقم ثابت. ناس بتلاقي من أول منتج، وناس بتجرب كذا منتج. عشان كده الحسبة والشيت مهمين: كل منتج بيقع على الورق بيوفر عليك فلوس إعلان. والمهم إنك تقفل المنتج الخسران بسرعة ومتتعلقش بيه.
كيف أجد منتج رابح للتجارة الإلكترونية؟
دور على منتجات بتحل مشكلة وعليها إعلانات شغالة من فترة في مكتبة إعلانات ميتا، احسب المكسب بعد الشحن والإعلان، واختبر بإعلان صغير قبل ما تشتري كمية. مكتبة الإعلانات خطوة بخطوة
عن الكاتب: عبدالرحمن الغنام، ٢١ سنة من القاهرة، بيختار ويختبر منتجات لمتاجره بنفسه. اعرف أكتر · الكورس · يوتيوب · تيك توك · انستجرام