ليه محدش يقدر يقولك رقم ثابت؟
اللي بيقولك "الإعلان بـ كذا جنيه" بيبيعلك باقة، مش بيقولك تكلفة ميتا الحقيقية.
ميتا بتشتغل بنظام مزاد. كل مرة حد بيفتح فيسبوك أو انستجرام، في إعلانات كتير عايزة تظهرله. ميتا بتختار مين يظهر على حسب كذا حاجة: المبلغ اللي انت مستعد تدفعه، وتوقعها إن الشخص ده هيتفاعل، وجودة الإعلان نفسه. (ميتا: عن المزادات الإعلانية)
يعني إعلانين بنفس الميزانية ممكن واحد يجيب نتيجة والتاني لأ. الفلوس مش هي الفرق. الإعلان هو الفرق.
بتدفع على إيه بالظبط؟
في أغلب الحملات انت بتدفع على الظهور: كل ما إعلانك يتعرض لناس أكتر، بتتصرف من ميزانيتك. مش بتدفع على الأوردر. (مستندات ميتا عن طريقة الحساب)
عشان كده ممكن تصرف الميزانية كلها ومييجيش ولا أوردر. ده مش نصب، ده معناه إن الناس شافت الإعلان ومحدش اقتنع. وده بيرجعنا لنقطة واحدة: الإعلان والعرض والمنتج.
إيه اللي بيحدد تكلفة الأوردر؟
دي الحاجات اللي بتخلي الأوردر يتكلف قليل أو كتير:
- الفيديو أو الصورة، خصوصا أول ٣ ثواني. لو محدش وقف، انت بتدفع على ناس بتعدي.
- المنتج نفسه. منتج بيحل مشكلة واضحة بيتباع أسهل.
- السعر والعرض. السعر منطقي؟ الشحن واضح؟ في دفع عند الاستلام؟
- صفحة المنتج والمتجر. لو العميل داس ولقى صفحة بطيئة أو مش مريحة، هيقفل.
- الجمهور. مهم، بس غالبا أقل أهمية من اللي فوق.
ازاي تحط ميزانية تجربة صغيرة؟
- اختار رقم انت مستعد تخسره كله. ده تمن إنك تتعلم، مش استثمار مضمون.
- قسمه على كام يوم بدل ما تصرفه في يوم واحد، عشان ميتا تلحق تتعلم مين بيشتري.
- اعمل ٢-٣ فيديوهات مختلفة لنفس المنتج، عشان تعرف أنهي اللي شغال.
- متلعبش في الإعلان كل ساعة. سيبه كام يوم وبعدين احكم.
مفيش رقم "صح" للميزانية. الرقم الصح هو اللي لو راح كله مش هيوقع بيتك.
ازاي تحسب أقصى تكلفة للأوردر من هامشك؟
دي أهم حسبة في الصفحة دي:
- سعر البيع ناقص تكلفة المنتج والتغليف والشحن = المكسب قبل الإعلان.
- حط في حسابك الأوردرات اللي بترجع في الدفع عند الاستلام.
- اللي فاضل هو أقصى مبلغ تدفعه في الإعلان للأوردر من غير خسارة.
- اختار رقم أقل منه يسيبلك مكسب. ده "رقم الأمان" بتاعك.
الحسبة كاملة بمثال: ازاي تحسب سعر المنتج وأقصى مبلغ تدفعه في الإعلان.
بعد الإعلان، بص في Ads Manager على تكلفة الأوردر. لو أقل من رقم الأمان، كمل. لو أعلى بكتير، غير حاجة. ده أهم من أي رقم تاني. خطوات أول إعلان: أول إعلان على فيسبوك وانستجرام.
زرار "ترويج" (Boost) ولا Ads Manager؟
- زرار الترويج (Boost): سريع، بتدوس على بوست وتحط ميزانية. بس اختياراته قليلة، ومش معمول إنه يدورلك على اللي هيشتري من متجرك.
- Ads Manager: فيه اختيارات أكتر، أهمها إنك تختار هدف المبيعات وتقيس الأوردرات.
لو بتبيع من متجر، ابدأ من Ads Manager. الترويج ينفع لو عايز بس ناس أكتر تشوف بوست.
ازاي تدفع لميتا من مصر؟
- ميتا بتقبل كروت بنكية (كريديت أو ديبت) ضمن طرق الدفع، والطرق المتاحة بتظهرلك في إعدادات الدفع في حسابك. (ميتا: طرق الدفع)
- لازم يكون الكارت مفعل عليه الشراء أونلاين، وغالبا الدفع الدولي.
- اسأل البنك بتاعك عن الحد المسموح ورسوم المعاملات الدولية قبل ما تبدأ، لأن الحاجات دي بتتغير ومن بنك لبنك.
- لو الكارت اترفض، غالبا السبب من البنك مش من ميتا. كلمهم.
لو عايز تمشي الخطوات دي بالترتيب لحد أول أوردر، ده اللي بشرحه في الكورس.
أسئلة بتتسأل كتير
كم تكلفة الإعلان الممول على الفيس بوك؟
مفيش تكلفة ثابتة. انت بتحدد ميزانيتك اليومية أو الكلية، وميتا بتصرفها على ظهور إعلانك في مزاد، والنتيجة بتختلف حسب الإعلان والمنتج والجمهور.
الاعلان الممول على انستجرام بكام؟
نفس الفكرة بالظبط. إعلانات انستجرام وفيسبوك بتتعمل من نفس المكان (Ads Manager) وبنفس نظام المزاد، ومفيش سعر ثابت.
أقل ميزانية أبدأ بيها كام؟
مش هقولك رقم. ابدأ بمبلغ انت مستعد تخسره كله، وقسمه على كام يوم، واحسب رقم الأمان بتاعك الأول.
ليه صرفت الميزانية ومجاليش أوردرات؟
لأنك بتدفع على الظهور مش على الأوردر. الناس شافت ومحدش اقتنع. راجع الخطوات دي: إعلاني شغال ومش جايب أوردرات.
هل الإعلان الممول بيضمن مبيعات؟
لأ. محدش يقدر يضمن مبيعات ولا ربح. الإعلان بيوصل منتجك لناس، والباقي على المنتج والعرض والمتجر.
عن الكاتب: عبدالرحمن الغنام، ٢١ سنة من القاهرة، شغال في التجارة الإلكترونية من وهو ١٦ سنة، ومؤسس INTENTIONS. بيعلم الشباب في مصر يبنوا متجرهم من الصفر لأول أوردر. اعرف أكتر · الكورس · انستجرام · تيك توك · يوتيوب