ليه الإعلان الممول لا يعمل؟ اقرا الأرقام الأول
قبل أي تعديل، افتح Ads Manager وبص على الرحلة دي:
- كام واحد شاف الإعلان (الوصول أو مرات الظهور).
- كام واحد داس على الإعلان ودخل المتجر.
- كام واحد حط المنتج في السلة.
- كام واحد طلب فعلا.
مش محتاج تعرف "الرقم الطبيعي" لكل خطوة. بص فين الناس بتقع:
- ناس كتير شافت ومحدش داس؟ المشكلة في الإعلان نفسه.
- ناس داست ومحدش حط في السلة؟ المشكلة في صفحة المنتج أو السعر.
- حطوا في السلة ومطلبوش؟ المشكلة في الشيك أوت أو الثقة أو الشحن.
ده بيوفر عليك أسابيع من التخمين.
الترتيب: ٨ أسئلة، واحد ورا التاني
١. الإعلان اترفض ولا قيد المراجعة؟
لو الإعلان لسه قيد المراجعة، هو مش بيظهر لحد أصلا. استنى. لو اترفض، ميتا بتقولك السبب، وتقدر تطلب مراجعة تانية لو شايف إنه اترفض غلط. (ميتا: طلب مراجعة القرار) صلح السبب الأول، متعيدش رفع نفس الإعلان زي ما هو.
٢. الداتا لسه قليلة؟
إعلان شغال من ساعات قليلة بميزانية صغيرة لسه مقالش حاجة. اديله كام يوم قبل ما تحكم. كل تعديل كبير بيرجعه يتعلم من الأول.
٣. الهدف غلط؟
لو اخترت هدف تفاعل أو زيارات، ميتا هتجيبلك ناس بتعمل لايك أو بتدوس، مش ناس بتشتري. لو بتبيع من متجر، الهدف المبيعات.
٤. الفيديو (أول ٣ ثواني)
ده أكتر سبب. لو أول ٣ ثواني مفيهمش مشكلة واضحة أو "واو"، الناس بتعدي. جرب ٢-٣ بدايات مختلفة لنفس الفيديو قبل ما تغير أي حاجة تانية.
٥. العرض والسعر
السعر مكتوب؟ الشحن واضح؟ في دفع عند الاستلام؟ لو العميل لازم يدور عشان يعرف هيدفع كام، هيقفل. اسأل نفسك بصراحة: لو أنا شفت الإعلان ده، كنت هشتري بالسعر ده؟
٦. صفحة المنتج والمتجر
افتح متجرك من موبايل بنت داتا ضعيفة. بيفتح بسرعة؟ الصور حقيقية؟ في وصف واضح ورقم أو واتساب للتواصل؟ المتجر اللي شكله مش جدي بيخوف الناس من الدفع عند الاستلام كمان. ازاي تعمل متجر Shopify
٧. المنتج نفسه
أحيانا الإعلان كويس والمتجر كويس، بس المنتج مش مطلوب أو موجود أرخص في أي محل. لو جربت كذا فيديو وكذا عرض والنتيجة واحدة، غالبا المنتج. ازاي تلاقي منتج رابح
٨. الاستهداف (آخر حاجة)
الناس بتبدأ بيه وهو المفروض آخر حاجة. في الأول سيب الجمهور واسع في مصر بالسن المناسب. التضييق الزيادة مع ميزانية صغيرة غالبا بيأذي.
امتى أوقف وامتى أغير حاجة واحدة؟
- غير حاجة واحدة بس كل مرة. لو غيرت الفيديو والسعر والجمهور مرة واحدة، مش هتعرف إيه اللي فرق.
- وقف الإعلان لو صرفت مبلغ أكبر من رقم الأمان بتاعك بكتير ومجاش ولا أوردر. حسبة رقم الأمان
- وقف المنتج كله لو جربت كذا فيديو مختلف وكذا عرض، وكلهم بنفس النتيجة.
- كمل وزود بالراحة لو تكلفة الأوردر أقل من رقم الأمان.
إيه هو الإعلان الممول الناجح؟
إعلان ناجح مش اللي جاب لايكات كتير. الإعلان الناجح هو اللي تكلفة الأوردر فيه أقل من رقم الأمان، والأوردرات دي بتتأكد وبتوصل. ده الرقم الوحيد اللي بيقولك انت كسبان ولا لأ.
لو لسه بتعمل أول إعلان، ابدأ من هنا: أول إعلان على فيسبوك وانستجرام.
لو عايز تمشي الخطوات دي بالترتيب لحد أول أوردر، ده اللي بشرحه في الكورس.
أسئلة بتتسأل كتير
لماذا لا يعمل الإعلان الممول على فيسبوك؟
غالبا السبب واحد من دول: الإعلان لسه قيد المراجعة أو اترفض، أو الداتا لسه قليلة، أو الهدف غلط، أو الفيديو مش بيوقف الناس، أو العرض أو المتجر أو المنتج نفسه. امشي عليهم بالترتيب.
الإعلان الممول قيد المراجعة من فترة، أعمل إيه؟
طول ما هو قيد المراجعة مش بيظهر لحد. استنى، ومتعدلش فيه كتير لأن التعديل ممكن يرجعه للمراجعة. لو اترفض، اقرا السبب وصلحه أو اطلب مراجعة.
أغير الاستهداف ولا الفيديو الأول؟
الفيديو. الاستهداف آخر حاجة تلعب فيها، خصوصا مع ميزانية صغيرة.
الناس بتدخل المتجر ومش بتطلب، ليه؟
المشكلة بعد الإعلان: السعر، الشحن، صفحة المنتج، أو الثقة في المتجر. الإعلان عمل شغله ووصلهم.
هل في إعلان مضمون يجيب مبيعات؟
لأ. محدش يقدر يضمن مبيعات. اللي تقدر تعمله إنك تختبر بفلوس صغيرة وتقرا الأرقام وتغير حاجة واحدة كل مرة.
عن الكاتب: عبدالرحمن الغنام، ٢١ سنة من القاهرة، شغال في التجارة الإلكترونية من وهو ١٦ سنة، ومؤسس INTENTIONS. بيعلم الشباب في مصر يبنوا متجرهم من الصفر لأول أوردر. اعرف أكتر · الكورس · انستجرام · تيك توك · يوتيوب